သမိုင်းဝင်အချစ်ဇာတ်လမ်းအတွင်းမှတတိယလူ(သို့မဟုတ်)တောင်သမန်လယ်စားမောင်ဖေငယ်

တောင်သမန်လယ်စားမောင်ဖေငယ်ဟူသောနာမည်ကို မြန်မာ့သမိုင်းချစ်သူတို့သိရှိပြီးသားဖြစ်လောက်ပါ သည်။ ကုန်းဘောင်ခေတ်နှောင်းပိုင်းစာဆိုတော်တစ်ဦးလည်းဖြစ...

တောင်သမန်လယ်စားမောင်ဖေငယ်ဟူသောနာမည်ကို မြန်မာ့သမိုင်းချစ်သူတို့သိရှိပြီးသားဖြစ်လောက်ပါ သည်။ ကုန်းဘောင်ခေတ်နှောင်းပိုင်းစာဆိုတော်တစ်ဦးလည်းဖြစ်ပြီး ၎င်းရေးသားသည့်စာပေများအားလည်း ယနေ့ သင်ရိုးစာအုပ်များတွင်သင်ကြားပြသလျှက်ရှိပါသည်။ သို့သော်တောင်သမန်လယ်စားမောင်ဖေငယ် ဟုနာမည်တွင်သည့် မောင်ဖေငယ်သည် ကုန်းဘောင်ခေတ်နှောင်းပိုင်း၏ နာမည်ကျော်အချစ်ဇာတ်လမ်း တစ်ပုဒ်ဖြစ်သည့် သီပေါဘုရင်မင်းမြတ်နှင့် အပျိုတော်ဒိုင်းခင်ခင်တို့၏ အချစ်ဇာတ်လမ်းတွင် တတိယလူတစ်ဦးအဖြစ် အရာရာအားစွန့်လွှတ်အနစ်နာခံခဲ့ရသူတစ်ဦးလည်းဖြစ်ကြောင်းသိရှိသူနည်းပါးလှပါသည်။

ကုန်းဘောင်မင်းဆက်၏နောက်ဆုံးမင်းဖြစ်သည့် သီပေါမင်းနှင့် မောင်မောင်တုတ်၊ မောင်ဖေငယ်တို့သည် ငယ်သူငယ်ချင်းများဖြစ်ကြ၍ တစ်ဦး၏သဘောကိုတစ်ဦးမှ အတွင်းသိအစင်းသိပုဂ္ဂိုလ်များလည်း ဖြစ်ကြပါသည်။ မောင်ဖေငယ်သည် ငယ်စဉ်ကတည်းကပင် စာပေဝါသနာပါ၍ ကဗျာများစာများရေးသား တတ်သူတစ်ဦးဖြစ်၍ ငယ်ရွယ်သောသီပေါမင်းသားမှ စုဖုရားလတ်မင်းသမီးအားပန်းပိုးရာတွင်လည်း ၎င်းမှ စာများ ကဗျာများရေးသားပေးကာ သီပေါမင်းသားနှင့်စုဖုရားလတ်မင်းသမီးတို့အား နီးစပ်စေခဲ့သည့် အောင်သွယ်တော်မြှားနတ်မောင်တစ်ဦးလည်းဖြစ်ပါသည်။

သီပေါမင်းနန်းတက်ပြီးနောက် ငယ်သူငယ်ချင်းများဖြစ်သည့် မောင်ဖေငယ်နှင့်မောင်မောင်တုတ်တို့အားလည်း ထိုက်သင့်သည့်ရာထူးအဆောင်အယောင်များအဖြစ် မောင်မောင်တုတ်အား ရနောင်မြို့အားအပိုင်စားပေးကာ မင်းသားအဖြစ်ချီးမြှောက်ခဲ့ပြီး မောင်ဖေငယ်အား ရွှေတိုက်စိုးအဖြစ် တောင်သမန်အင်းကြီးနှင့် လယ်မြေများကိုအပိုင်စားပေးရာထူးအသီးသီးပေးကာ ချီးမြှောက်ခဲ့ပါသည်။ မောင်ဖေငယ်တွင် ငယ်စဉ်ဘဝကတည်းက တိတ်တခိုးချစ်ရသူမိန်းကလေးတစ်ဦးရှိလေသည်။ ထိုမိန်းကလေးမှာအခြားသူမဟုတ် ကုန်းဘောင်ခေတ်နှောင်းပိုင်း၏ နာမည်ကျော်အပျိုတော်တစ်ဦးဖြစ်လာမည့် ဒိုင်းခင်ခင်ခေါ် ဒိုင်းဝန်မင်းကြီး၏ သမီးကလေး ခင်ခင်ကြီးပင်ဖြစ်ပါသည်။

ခင်ခင်ကြီးခေါ် ဒိုင်းခင်ခင်

မောင်ဖေငယ်နေရာရလာသောအခါ တိတ်တခိုးချစ်ရသူဖြစ်သည့် ဒိုင်းခင်ခင်၏ ဖခင် ဒိုင်းဝန်မင်းကြီးအား     ပုဂံမြို့ကိုအပိုင်စားပေးခံရရန်နှင့် အတွင်းဝန်မင်းကြီးအဖြစ်ရာထူးတိုးမြှင့်ခြင်းခံရရန် ကြိုးစားပေးခဲ့ပါသည်။ ထိုအချိန်တွင် ဘုရင့်နန်းတော်အတွင်းတွင် သီပေါမင်း၏ မိဖုရားအချင်းချင်းအချစ်လုပွဲကြီးဖြစ်ပွားနေသည့် အချိန်လည်းဖြစ်ပါသည်။ ထုံးတမ်းအစဉ်အလာအရ ညီအစ်မသုံးဦးအတွင်းတွင်အကြီးဆုံးမင်းသမီးဖြစ်သည့် စုဖုရားကြီးသည် မိဖုရားခေါင်နေရာတွင်ရှိရမည်ဖြစ်၍ စုဖုရားလတ်သည်မိဖုရားကြီးနေရာတွင်ရှိရ မည်သာဖြစ်သည်။ သို့သော်ဘိသိတ်ပွဲကျင်းပသောအခါ စုဖုရားလတ်သည်ရာဇပုလ္လင်ပေါ်တက်ထိုင်၍ သီပေါမင်း၏ငယ်ချစ်ဦးဖြစ်သဖြင့် ၎င်းကိုပါဘိသိတ်သွန်းရန်အတင်းဆောင်ရွက်ရာ ညီအစ်မနှစ်ဦးအား သီပေါမင်းနှင့်အတူ ဘိသိတ်သွန်းလောင်းခဲ့ရသည်။

စုဖုရားကြီးသည်မိဖုရားခေါင်ကြီးဖြစ်လာသော်လည်း သီပေါမင်းမှစုဖုရားကြီးအဆောင်သို့ အဆောင်တော်မကူးစေရန် စုဖုရားလတ်မှနှုတ်မိန့်ဖြင့်တားမြစ်ထားသည်။ မုန့်ကိုသာခွဲဝေစားမည် အချစ်ကိုခွဲဝေမစားဟူသောခံယူချက်ဖြင့် တစ်လင်တစ်မယားစနစ်ကိုရအောင်အကောင်အထည်ဖော်လေသည်။ နန်းတက်ပြီးမကြာမီပင် စုဖုရားလတ်သည် သားတော်လေးတစ်ပါးဖွားမြင်ခဲ့ပြီး နောက်မကြာမီပင်၎င်းသားတော်လေးကွယ်လွန်ပြန် လေသည်။ ဘုရင်နှင့်မိဖုရားနှစ်ပါးတို့ စိတ်ပျော်စေရန်နန်းတော်အတွင်းတွင် ပျော်ပွဲရွင်ပွဲများကျင်းပကြ၍ သီပေါမင်းအား ဘုန်းကံတတ်စေရန် ထပ်မံဘိသိတ်သွန်းလောင်းရန် ကြံစည်ကြလေသည်။ အစဉ်အလာအရ ဘိသိတ်ပွဲတွင် ဘိသိတ်တော်ဆက်အပျိုတော်အဖြစ် အပြစ်အနာအဆာကင်းလွတ်သည့် အပျိုစင်စစ် မိန်းကလေးအားရွေးချယ်ရမည်ဖြစ်ရာ မိန်းမကိစ္စတွင်နာမည်ကျော် ရနောင်မောင်မောင်တုတ်က တာဝန်ယူရလေသည်။

သီပေါမင်း၊ စုဖုရားကြီးနှင့် စုဖုရားလတ်

ဤတွင်မောင်မောင်တုတ်သည် ဒိုင်းဝန်မင်းကြီး၏သမီးတော်ဖြစ်သည့် ခင်ခင်ကြီးခေါ် ဒိုင်းခင်ခင်အား အပျိုတော်အဖြစ်ရှေ့တော်သွင်းလေသည်။ ဒိုင်းခင်ခင်၏ ယဉ်ကျေးသိမ့်မွေ့၍ ချောမောလှပသည့် ရုပ်ရည်ကြောင့် စုဖုရားလတ်မှသဘောကျကာ အပျိုတော်အဖြစ်တာဝန်ပေးခြင်းခံရလေသည်။ ဒိုင်းခင်ခင်သည် စုဖုရားလတ်၏အပျိုတော်ဖြစ်လာသဖြင့် သီပေါမင်းအား စုဖုရားလတ်ခစားတိုင်း ပါဝင်ခစားရသူဖြစ်လာလေသည်။ ဒိုင်းခင်ခင်သည် နန်းတော်အတွင်းတွင်အခြားသောအပျိုတော်များထက် လှပသူဖြစ်ရာ ၎င်းအားသီပေါမင်းမှ မျက်စိကျလေတော့သည်။ ထိုအချိန်တွင် စုဖုရားလတ်မှ သမီးတော်တစ်ဦးမွေးဖွားရာ သီပေါမင်းသည် သမီးတော်လေးအားအကြောင်းပြကာ အဆောင်တော်သို့မပြန်ပဲအမြဲတတ်စေနေတတ်လေသည်။ 

သီပေါမင်းသည် ဒိုင်းခင်ခင်အားအလွန်တွယ်တာလာသဖြင့် တစ်နေ့တွင် ငယ်သူငယ်ချင်းများဖြစ်သည့် ရနောင်မောင်မောင်တုတ်နှင့် တောင်သမန်လယ်စားမောင်ဖေငယ်တို့အား ဖွင့်ပြောမိလေသည်။ ဖွင့်ပြောမိရုံသာမက မောင်ဖေငယ်အား ဒိုင်းခင်ခင်အားပိုးပန်းရန်အတွက် စာများကဗျာများရေးသားရန် တာဝန်ပေးလေသည်။  မောင်ဖေငယ်သည် ဒိုင်းခင်ခင်သည်၎င်း၏ငယ်ချစ်ဖြစ်သည်ကတစ်ကြောင်း ထိုအကြောင်းအား စုဖုရားလတ်သိပါက မိုးမီးလောင်မည်ကတစ်ကြောင်းရိပ်မိသဖြင့် ရင်ထဲတွင်မီးမြှိုက်သကဲ့သို့ခံစားရသော်လည်း ဘုရင့်ရှေ့တွင်ဖြစ်သဖြင့် မြိုသိပ်၍တာဝန်ကိုလက်ခံရယူလိုက်ရလေသည်။

နောက်ရက်များတွင် သီပေါမင်းနှင့် ဒိုင်းခင်ခင်တို့နီးစပ်ရန်အတွက် မြှားနတ်မောင်မှ မောင်ဖေငယ်ဖြစ်လာလေသည်။ ထိုနေများသည်မောင်ဖေငယ်အတွက် ငရဲပင်ဖြစ်လေသည်။ မိမိအလွန်ချစ်မြတ်နိုးရသူနှင့် ငယ်သူငယ်ချင်းအရင်းကြီးဖြစ်နေသည့် ဘုရင်အား အောင်သွယ်လုပ်ပေးရသည့်ကိစ္စမှာ လွယ်ကူသည့်ကိစ္စတော့ မဟုတ်ပေ။ ဤသို့ဖြင့် သီပေါမင်းနှင့်ဒိုင်းခင်ခင်သည် မကြာခင်ပင်ချစ်သူများအဖြစ်သို့ရောက်ရှိသွားလေ တော့သည်။ ထိုအကြောင်းကိုစုဖုရားလတ်သိရှိသွားသည့်အခါ ထင်သည့်အတိုင်းပင်ပြဿနာကြီးတက်လေတော့သည်။ စုဖုရားလတ်နှင့်သီပေါမင်းတို့ပြဿနာအကြီးအကျယ်တက်ကာ သီပေါမင်းမှစုဖုရားလတ်အား လက်တော်သုံးဓါးဖြင့်ခုတ်ရန်ပင် ရွယ်ခဲ့သည်။ ထို့ကြောင့်စုဖုရားလတ်သည် မာယာသုံး၍ ဒိုင်းခင်ခင်အား မြောက်နန်းစံမိဖုရားအဖြစ်ထားရှိမည်ဟု သီပေါမင်းအားနားချကာ ချစ်ရသူသီပေါမင်းနှင့်ဒိုင်းခင်ခင်တို့၏ အချစ်ဇာတ်လမ်းတွင်ပါဝင်သူများအား ဖျက်ဆီးရန်ဆောင်ရွက်လေတော့သည်။ 

ပထမဆုံးသီပေါမင်းအား ဒိုင်းခင်ခင်နှင့်မောင်ဖေငယ်တို့သည် သီပေါမင်း၏နောက်ကွယ်တွင် ချစ်ကြိုက်နေကြောင်းသွေးထိုး၍ သီပေါမင်း၏အနားတွင် သစ္စာမရှိသူများရှိကြောင်းဖော်ထုတ်ရန် တိုင်းလေးပြင်လေးရပ်တွင် တိုင်စာများလက်ခံသင့်သည်ဟု အကြံပေး၍ ၎င်းတိုင်စာများတွင် ရနောင်မောင်မောင်တုတ်အား အတိုင်ခံရရန်ဆောင်ရွက်လေသည်။ ရနောင်မောင်မောင်တုတ်သည်လည်း မောက်မာသူဖြစ်သဖြင့် လူမုန်းများသူ ဖြစ်သောကြောင့် ဘုရင့်ထံရောက်ရှိလာသောတိုင်စာများ၏ တစ်ဝက်သည် မောင်မောင်တုတ်၏တိုင်စာများသာဖြစ်လေသည်။ ထိုအကြောင်းများကိုသီပေါမင်းကြားသောအခါ မောင်မောင်တုတ်အားထောင်ချထားစေ၍ ဒိုင်းခင်ခင်နှင့်ချစ်ကြိုက်နေသည်ဟုဆိုသူ မောင်ဖေငယ်အားလည်းရာထူးမှချကာ ဗန်းမော်သို့ဖမ်းဆီး ပို့ထားလိုက်လေသည်။ ဒိုင်းခင်ခင်၏ ဒိုင်းဝန်မင်းကြီးသည်လည်း စုဖုရားလတ်၏နှုတ်မိန့်အကြောင့် အသတ်ခံရလေသည်။

ခရစ်နှစ် ၁၈၈၂ ခုနှစ် ဖေဖော်ဝါရီလ ၁၇ ရက်နေ့တွင် ဗန်းမော်တွင်အကျဉ်းကျနေသည့် မောင်ဖေငယ်အား ကွပ်မျက်လိုက်လေသည်။ မောင်ဖေငယ်ကွပ်မျက်ခံရပြီးနောက် ဒိုင်းခင်ခင်လည်းဖမ်းဆီးခြင်းခံရလေသည်။ ထိုအချိန်တွင် ဒိုင်းခင်ခင်တွင် သီပေါမင်းနှင့်ရသောကိုယ်ဝန်ရှိနေပြီဖြစ်သဖြင့် ခွင့်လွတ်ပေးရန် တိုင်းတားမင်းကြီးတို့မှတောင်းပန်သော်လည်း နောက်ဆုံးတွင် သီပေါမင်း၏အချစ်ကိုလုယူခဲ့သည့် ဒိုင်းခင်ခင်အား အဝတ်အစားများချွတ်စေ၍ လည်မြိုအားဝါးရင်းဒုတ်ဖြင့် ရိုက်သတ်စေရန် စုဖုရားလတ်မှအမိန့်ချမှတ်ခဲ့သည်။ 

တောင်သမန်လယ်စားမောင်ဖေငယ်မသေဆုံးမီတွင် မိုးကောင်းဝန်မင်းအားပေးခဲ့သည့် တေးထပ်ကဗျာတစ်ပုဒ်ရှိလေသည်။ ရာဇဒဏ်ဖြင့်ဗန်းမော်သို့ပို့ထားခံရသည့်အချိန်တွင် သီပေါမင်းနှင့်စုဖုရားလတ်တို့၏အနားတွင် မိဖုရားအသစ်တစ်ပါးရောက်ရှိကြောင်းကြားသိရသဖြင့် အလွန်ချစ်မြတ်နိုးရသူ ငယ်ချစ်ဟောင်း ခင်ခင်ကြီးခေါ် ဒိုင်းခင်ခင်တစ်ယောက်မိဖုရားအဖြစ်စံမြန်းနေပြီဟုထင်မှတ်ကာ ဝမ်းနည်းဝမ်းသာဖြစ်လျှက် သေဆုံးသွားပါက ၎င်း၏ရုပ်လောင်းအားလာရောက်ကြည့်ရှုပါအုံးဟု သံတော်ဦးတင်သည့်ကဗျာတစ်ပုဒ်ဖြစ်လေသည်။ သို့သော်ထိုအချိန်တွင် ချစ်ရသူဒိုင်းခင်ခင်သည် သီပေါမင်း၏ရင်သွေးကိုလွယ်ထား၍ အာဏာပါးကွက်သားတို့၏ ရိုက်သတ်ခြင်းကိုခံနေရသည့်အချိန်ဖြစ်ကြောင်း သူသိရှိသွားခြင်းမရှိပေ။

မောင်ဖေငယ်ရေးသားခဲ့သည့် တေးထပ်ကဗျာမှာ အောက်ပါအတိုင်းဖြစ်ပါသည်-

ချစ်ရသူ ခင်ခင်ငဲ့၊
ဘဝင်မြင့်သက်ညှာ၊
ဆင်မသင့် ခက်ပါသည်၊
သက်သာရာမရ၊
သည်ကိုဖြင့် တိမ်းခဲ့ချော်ပြီ၊
စိမ်းနဲ့နော် ဘုန်းခင့်လာပ။

ကလာပ်စုရုပ်ကြွင်းကို၊
ပြုတ်ယွင်းယိုကာလ၊
ဖုတ်သင်္ဂြိုဟ်စျာပန၊
ပြာကျမှ ပြန်ပါ၊
ဝဇီရာစိန်သံလျှင်းငယ်နှင့်၊
တရှိန်ချင်း လှမ်းချင်လို့မှာ။

ဝတိံဆင်း နန်းကိန္နရာလို၊
လျှမ်းထိန်ဝါဝေဝင်းနှင့်၊
ရွှေပယင်းငွေလက်တော်၊
ဘုန်းကိုင်ခဲ့နော်၊
အသုဘ ကမ္မဋ္ဌာန်းတော်ကို၊
ကြငှန်းပျော် အိုရှုလှည့်လေး။ ။

သက်တံ့နောင်(Wizardry Myanmar)